Пазарот на криптовалути повторно покажа колку брзо може да ја смени сликата за богатството. Во првите месеци од 2026 година, падот на биткоин избриша повеќе од 20.000 адреси што претходно држеле над еден милион долари во оваа криптовалута, покажува анализа на Finbold. Според објавените податоци, бројот на такви адреси се намалил за 20.564, од 131.125 на 110.561.
Најголемиот удар го почувствувале адресите во опсегот од еден до десет милиони долари, што покажува дека токму средниот слој инвеститори бил најранлив на ценовниот пад. Истовремено, бројот на адреси со повеќе од 10 милиони долари исто така се намалил, но значително помалку, за 2.596 адреси.
Според истата анализа, причината не е масовна распродажба, туку остар пад на цената на биткоин. Откако во октомври 2025 година достигна врв над 125.000 долари, биткоин до 24 февруари 2026 година загубил околу половина од вредноста.
Ова дополнително ја продлабочува разликата меѓу помалите и големите играчи. Додека многу адреси паднале под симболичната граница од милион долари, поголемите институционални инвеститори и понатаму остануваат поотпорни на ваквите корекции. Сепак, важно е да се има предвид дека една личност може да контролира повеќе адреси, па оваа метрика не значи буквално дека исчезнале толку индивидуални милионери, туку дека толку адреси паднале под тој праг.
