Иако САД и Израел во изминатиот период извршија серија силни напади врз цели во Иран, дел од експертите оценуваат дека најважните воени капацитети на Техеран сè уште не се сериозно погодени. Професорот од МИТ, Теодор Постол, во разговор објавен на YouTube каналот на политикологот Глен Дизен, посочи дека досегашната штета главно се однесува на надземни објекти, додека клучниот дел од иранскиот арсенал е сместен во подземна инфраструктура изградена токму за вакви сценарија.
Според оваа проценка, Иран со години систематски развивал мрежа од тунели, утврдени складишта и подземни комплекси, со цел да ги заштити највредните воени ресурси од воздушни напади. Затоа, дури и кога се погодени влезови или надворешни делови од објектите, тоа не мора автоматски да значи дека се уништени и самите капацитети сместени длабоко под земја.
И Ројтерс претходно објави дека американските проценки можат со сигурност да потврдат уништување на околу една третина од иранскиот ракетен арсенал, додека за друг значаен дел состојбата останува нејасна, токму поради можноста тие системи да се наоѓаат во тунели и бункери.
Тоа значи дека, и покрај претрпените удари и сериозниот притисок, Иран сè уште може да задржи дел од способноста за понатамошен одговор. Во услови на растечка регионална ескалација, подземната воена мрежа останува еден од најголемите предизвици за секоја идна операција насочена кон неутрализирање на иранските капацитети.
