Повеќе од илјада музичари, меѓу кои и познати имиња како Massive Attack, Kneecap, Brian Eno, Sigur Rós и Nadine Shah, потпишаа отворено писмо со кое повикуваат на бојкот на Евровизија поради учеството на Израел.
„Одбиваме да молчиме додека геноцидното насилство на Израел ги следи и ги замолчува палестинските животи. Додека децата во израелските затвори страдаат од тепање затоа што пеат. Додека речиси секоја сцена, студио, книжарница и универзитет во Газа останува само куп урнатини, под кои телата на убиените сè уште лежат чекајќи извлекување и достоинствен погреб.“
Портпаролот на иницијативата „Без музика за геноцид“ изјави дека луѓето ширум светот се борат против соучесништвото во различни индустрии и повика на солидарност.
Организаторите ги пофалија земјите како Шпанија, Ирска, Словенија, Холандија и Исланд за повлекувањето од натпреварот, како и поединечни финалисти од националните избори кои одбиле да учествуваат.
Од Европска радиодифузна унија повторно ја бранеа одлуката Израел да учествува, и покрај критиките за двојни стандарди, потсетувајќи дека на Русија ѝ беше забрането учество во 2022 година поради инвазијата врз Украина.
Годинешното, 70-то издание на Евровизија 2026 ќе се одржи во Виена, а финалето е закажано за 16 мај 2026 година.
