На европските аеродроми и гранични премини веќе се забележуваат зголемени гужви поради примената на новиот систем за влез/излез (EES), кој стартуваше на 10 април и воведува построга контрола на државјани од таканаречени трети земји, меѓу кои се и земјите од регионот.
Овој систем веќе создава подолги редици и доцнења, а експертите предупредуваат дека вистинските проблеми допрва доаѓаат со почетокот на летната туристичка сезона.
Нов систем ETIAS од крајот на 2026 година
Дополнителен притисок се очекува со воведувањето на новиот систем ETIAS (Европски систем за информации и одобрување на патување), кој треба да започне во последниот квартал од 2026 година.
Системот ќе биде задолжителен за патување во Шенген зоната и ќе се однесува на околу 60 држави, односно влез во 30 европски земји, меѓу кои и членките на ЕУ, како и Норвешка, Швајцарија и Исланд.
Иако не претставува класична виза, ETIAS ќе биде дополнителна безбедносна проверка пред патување.
Како ќе функционира
- Апликација онлајн
- Цена: околу 20 евра
- Важност: до 3 години или до истек на пасош
- Време на обработка: од неколку минути до 14 дена (понекогаш и подолго)
Иако одобрената дозвола ќе овозможува престој до 90 дена во период од 180 дена, таа не гарантира автоматски влез, бидејќи граничните служби можат дополнително да го одбијат патникот.
Предупредувања од експертите
Експертите укажуваат дека комбинацијата на системите EES и ETIAS може да го забави протокот на патници, особено во периоди со голем сообраќај како празници и летни одмори.
Туристичките организации препорачуваат патниците да аплицираат навреме штом системот стане достапен, за да избегнат доцнења и компликации при патување.
