Грчките власти разбија меѓународен синџир за нелегално производство и шверц на цигари, кој според проценките го оштетил државниот буџет за околу една милијарда евра.
Според грчката агенција АНА-МПА, акцијата е резултат на четиримесечна истрага и координирана полициска операција. Во рамки на акцијата биле извршени претреси на 42 локации, меѓу кои луксузни вили, хотели, апартмани, како и објект за кој се сомнева дека служел за производство на нелегален тутун.
Исто така биле запленети 76 пловни објекти (вклучувајќи танкер и два товарни брода), 26 луксузни возила, камиони и кампери, како и блокирани банкарски сметки и сефови поврзани со мрежата.
Според истрагата, во криминалната група биле вклучени 38 лица и 21 фирма. Две главни фигури, познати под прекарите „Претседателот“ и „Путин“, наводно ја раководеле операцијата, додека други членови имале клучни улоги во дистрибуцијата и логистиката.
Потеклото на парите било прикривано преку фиктивни компании и лажни фактури, со цел легализација на приходите од нелегалната трговија.
Истрагата продолжува со цел да се утврди дали нелегалните производи биле дистрибуирани и на пазари во соседните балкански земји.
