Велес е во шок по синоќешната филмска брканица и семејна драма каква што не се памети! 33-годишната З.Б.П. приредила вистинско „шоу“ на деструкција кое започнало во нејзиниот дом, а завршило со полициски лисици и скршени возила.
Сè започнало околу 21:45 часот кога во домот на велешанката избила жестока расправија. Наместо смирување на страстите, 33-годишната жена физички го нападнала својот една година помлад сопруг. Откако го „решила“ него, таа седнала во своето возило марка „Фиат“ и под дејство на алкохол се упатила кон центарот на градот.
Дивеењето продолжило на најпрометната улица во Велес. Изгубената контрола над возилото и алкохолот во крвта биле кобна комбинација – таа директно се судрила со автомобил „Рено“, управуван од 69-годишен сограѓанин. Од силниот удар, жената се здобила со телесни повреди, но тоа не ја спасило од полицијата.
„Лицето е лишено од слобода по пријавен физички напад врз сопругот и предизвикување сообраќајна незгода,“ потврдуваат од СВР Велес.
Оваа луда ноќ за велешанката завршува во полициска станица. Против неа ќе бидат поднесени серија пријави – од семејно насилство до загрозување на јавната безбедност во сообраќајот. Граѓаните се прашуваат: што треба да се случи за да се тргнат ваквите „бомби“ од улиците?
