Бугарските власти истражуваат убиство на шест лица поврзани со еколошка невладина организација, а полицијата разгледува неколку верзии, вклучувајќи и можност за врска со култ, објави „Дневник.бг“.
Минатата недела беа пронајдени телата на тројца возрасни (45–51 година) во викендичка во сопственост на организацијата, лоцирана близу превојот Петрохан на северозападот на Бугарија. Жртвите – адвокат со меѓународно искуство, сопственик на книговодствена фирма и инструктор по нуркање – имале прострелни рани.
Тогаш беше издадена потерница за тројца осомничени, меѓу кои и директорот на организацијата и сопственик на викендичката, Ивајло Калушев, кој избегал со две млади лица (15 и 22 години). Денеска, бугарските медиуми јавија дека Калушев и двете момчиња биле пронајдени убиени во кампер во шума, случајно откриени од овчар.
На местото се во тек истражни дејствија, а полицијата го опколила подрачјето. Криминалниот психолог Неделчо Стојчев го опиша Калушев како „нарцисоиден психопат“ поради претходното однесување кон членовите на организацијата и врз основа на првото тројно убиство.
Главниот обвинител на Бугарија, Борислав Сарафов, случајот го нарече „колибата на ужасите“ и го спореди со американската ТВ серија „Твин Пикс“, додавајќи дека активностите на организацијата дејствувале во свои интереси, надвор од државните органи.
Претходно, полицијата потврди дека трите тела од првото убиство биле пронајдени на 4 февруари, со обдукцијата која покажува дека поминале 12–18 часа од убиството до откривањето на телата. Во колибата, која потоа беше запалена, биле пронајдени голем број пушки и пиштоли.
Колибата била силно обезбедена, со огради, камери, бариери и дронови. Жителите тврделе дека ја „штитат шумата и животната средина“, но ограничувале пристап на туристи и локално население.
Неофицијално, истражителите се сомневаат дека организацијата е поврзана со култ во кој учествуваат тинејџери и деца.
