По дебаклот со Лиам Росениор, кој издржа само три месеци на жешкото столче, Челзи не губи време. Лондонскиот гигант е во потрага по својот нов спасител, а очите на Тод Боли и раководството се вперени кон една од најголемите легенди на клубот – Цеск Фабрегас.
Отказот на Лиам Росениор, кој се случи по серијата од пет последователни порази без постигнат гол, го остави Челзи во „слободен пад“. Додека Калум Мекфарлејн ја презеде улогата на привремен тренер (caretaker) за претстојното полуфинале на ФА Купот против Лидс, клубот веќе го подготвува теренот за голема летна промена.
Најголемото изненадување доаѓа од Италија. Претседателот на Комо, Мирван Суварсо, во интервју за „Сити АМ“ изјави дека нема да биде пречка доколку Фабрегас реши да се врати во Премиер лигата.
„Ако тоа го прави среќен, тоа е негова работа. Сакате вашите вработени да останат што е можно подолго, но на крајот на денот, тој не е наша сопственост. Ако сака да оди во Челзи, слободен е“, дециден е Суварсо.
Шпанскиот стратег прави чуда во Серија А со тимот на Комо, каде не само што е тренер, туку е и сосопственик. Неговиот модерен пристап, напаѓачкиот фудбал и длабоката врска со Челзи го прават идеален кандидат за „рестарт“ на клубот. Иако неговото име се поврзува и со Арсенал, Челзи веќе почна да испитува дали тој е подготвен за еден од најнесигурните, но и најпредизвикувачките работни места во светот на фудбалот.
Додека навивачите сонуваат за враќање на својот омилен „магионичар“ со топката, поранешните играчи како Флоран Малуда предупредуваат дека ова може да биде преголем ризик за младата тренерска кариера на Цеск. Дали Фабрегас ќе прифати да влезе во „огнот“ на Стемфорд Бриџ или ќе продолжи да го гради својот пат во мирното Комо?
Едно е јасно: доколку Челзи го повика, Фабрегас ја има целосната слобода да каже „ДА“.
