Францускиот претседател Емануел Макрон од Атина испрати силна порака дека Европа мора да покаже повеќе единство, самодоверба и решителност во заштитата на сопствените интереси.
Во разговор со грчкиот премиер Киријакос Мицотакис, Макрон оцени дека европските земји се наоѓаат во чувствителен историски момент, во кој САД, Русија и Кина сè поотворено дејствуваат спротивно на европските позиции. Според него, тоа е знак дека Европа мора да се „разбуди“ и да почне појасно да ја поставува својата агенда.
Макрон нагласи дека односите со Вашингтон ќе останат важни, но предупреди дека тензиите со САД не треба да се гледаат како привремена појава. Тој смета дека американскиот пристап кон Европа е дел од подлабок тренд, кој нема да исчезне ниту по актуелниот политички циклус.
Францускиот претседател додаде дека Европа веќе нема простор да се однесува како да станува збор за краткотрајна криза. Според него, европските лидери денес подобро разбираат дека мора да настапуваат заеднички и да ги бранат интересите на континентот.
Посетата на Макрон во Атина доаѓа во период кога Франција и Грција треба да го обноват билатералниот безбедносен договор. Договорот, кој првично беше постигнат во 2021 година, вклучува меѓусебна одбранбена соработка и набавка на француски воени бродови од страна на Грција.
Новото продолжување треба да важи уште пет години, со можност за автоматско обновување, а се очекува соработката да се прошири и во надворешната политика, цивилната заштита и економијата.
