Тешка трагедија ја потресе Битола, откако 31-годишна жена била убиена во семејната куќа на нејзиниот татко во населбата Баир, во раните утрински часови.
Според првичните информации, осомничен е нејзиниот сопруг, со кого, како што се наведува, живееле одвоено поради претходни несогласувања. Инцидентот се случил околу 6:40 часот, кога мажот наводно влегол во куќата и ја нападнал жртвата со нож додека таа најверојатно спиела.
Од полицијата информираат дека 33-годишен маж е лишен од слобода, а по консултација со Јавното обвинителство против него ќе биде поднесена кривична пријава за убиство. На местото на настанот бил извршен увид од јавен обвинител, а по наредба се спроведува обдукција на телото, додека од куќата се подигнати материјални докази за понатамошна анализа.
По трагедијата, пред семејниот дом се собрале роднини и блиски на убиената, барајќи правда и целосно расчистување на случајот. Тие раскажуваат дека жртвата претходно живеела одвоено од сопругот и дека меѓу нив имало долготрајни несогласувања и закани.
Членови на семејството сведочат дека кобното утро забележале движење на осомничениот заедно со неговиот татко и мајка, непосредно пред да се дознае за убиството, што дополнително го продлабочува шокот и вознемиреноста кај роднините.
Во населбата Баир и околината денес е забележано засилено полициско присуство, додека истрагата продолжува под раководство на надлежното обвинителство.
