Рускиот претседател Владимир Путин потпиша закон кој дозволува експропријација, односно национализација, на неискористени станбени објекти во делови од Украина окупирани од руските трупи.
Членот 21 од законот предвидува дека „станбените згради, становите и собите кои покажуваат знаци на напуштеност се признаваат како сопственост на Доњецката Народна Република или нејзините општини“. Самопрогласената Доњецка Народна Република, формирана во 2014 година од паравоени формации поддржани од Русија, е анектирана од Русија и контролира дел од провинцијата Доњецк.
Слични закони се применуваат и во провинциите Луганск, Запорожје и Херсон, кои исто така се делумно или целосно окупирани од Русија.
Законот предвидува и можност за подоцнежна реприватизација, при што овие имоти би можеле да им се доделат на граѓаните кои ги загубиле своите домови поради украински напади. Дополнително, локалните власти ќе можат да ги користат овие имоти како службени резиденции за државни службеници.
Од почетокот на руската инвазија, милиони жители на источна Украина избегале за да избегнат насилство и уништување, а многумина сега се населиле во други делови на Украина или во странство. Токму тие лица, кои беа принудени да ги напуштат своите приватни домови, се директно засегнати од новата регулатива.
