Децата од градинката „Димче Мирчев“ од Велес учествуваа во голема еколошка акција за пошумување на опожарен дел во близина на езерото Младост, каде заедно со своите родители и воспитувачки засадија околу три илјади садници зимзелени дрвја.
Настанот се одржа под мотото „Засади дрвце, засади радост“, а беше организиран во соработка со Спортската академија „Јуниор“. Целта на активноста беше да се обнови уништениот простор и да се поттикне еколошката свест кај најмладите.
Од градинката истакнаа дека на повикот се одзвале деца од сите возрасни групи, вклучително и најмалите од јаслите, кои биле придружувани од своите родители. Преку директно учество, децата имале можност да научат за значењето на дрвјата и заштитата на природата на практичен начин.
Директорката Наташа Јанушева нагласи дека акцијата претставува важен воспитно-образовен момент, во кој најмладите преку игра и заедничка работа со возрасните стекнуваат свест за екологијата. Според неа, децата со голема радост и ентузијазам учествувале во садењето, придонесувајќи за создавање на нов зелен простор кој симболично е наречен „Нашата волшебна шума“.
Ова е втора ваква акција организирана од градинката. Садниците од зимзелени дрвја биле обезбедени од самата установа, додека јасенот е обезбеден од ЈП „Национални шуми“ – ПЕ „Бабуна“ од Велес. Теренот за пошумување бил претходно подготвен во соработка со ЈКП „Дервен“, со што биле создадени услови за успешно засадување на илјадниците садници.
