Од полноќ, по одлука на Регулаторната комисија за енергетика (РКЕ), се намалуваат малопродажните цени на нафтените деривати. Бензините и еуродизелот поевтинуваат за два денара по литар, додека цената на екстралесното масло за домаќинство се намалува за еден денар.
Новите малопродажни цени на горивата се:
- Еуросупер БС-95: 73 денари за литар
- Еуросупер БС-98: 75 денари за литар
- Еуродизел БС (Д-Е V): 66,5 денари за литар
- Екстралесно масло за домаќинство (ЕЛ-1): 65,5 денари за литар
Со одлуката на РКЕ, се намалува и малопродажната цена на мазутот М-1 НС за 0,248 денари за килограм, што сега ќе изнесува 32,635 денари за килограм.
Регулаторната комисија истакнува дека намалувањето е резултат на падот на референтните цени на нафтените деривати на светските пазари. Во споредба со претходната пресметка, цената на бензините се намалила за 4,932%, на дизелот за 4,357%, на екстралесното масло за 1,790%, а на мазутот за 1,013%.
