Германска полицајка е осудена на три години и три месеци затвор откако пред судот во Траунштајн признала вина за силување, сексуална злоупотреба на малолетничка, нанесување телесни повреди и поседување материјали со сексуална злоупотреба на деца.
Случајот привлече големо внимание во Германија откако беше обелоденето дека полицајката во август 2025 година ја нападнала 15-годишната ќерка на своја пријателка во тоалет на ресторан за брза храна.
Според наводите од постапката, пред нападот таа на малолетничката ѝ испратила порнографска порака преку WhatsApp.
Во текот на истрагата кај обвинетата биле пронајдени стотици дигитални датотеки со содржини што прикажувале сексуална злоупотреба на деца. Според истражителите, дел од материјалите содржеле исклучително тешки сцени, а најмладите деца прикажани на нив биле на возраст од околу три години.
На почетокот од судскиот процес обвинителството и одбраната договориле рамка на казна меѓу три и три и пол години затвор, под услов обвинетата целосно да ги признае делата што ѝ се ставале на товар.
Таа ги признала сите обвиненија, по што судот ѝ изрекол затворска казна од три години и три месеци.
Осудената полицајка во меѓувреме е суспендирана од службата и се наоѓа во притвор во Минхен.
