Инфлуенсерката Стејси Варнеки (30) починала од компликации предизвикани од тешко постпородилно крвавење по породување во домашни услови, а во моментот во домот биле присутни само нејзиниот сопруг и дулата.
Трагедијата се случила во Мелбурн, кога на 29 септември Стејси го родила својот син во домашни услови. Иако бебето било здраво, состојбата на мајката драматично се влошила. Брзата помош била повикана околу 4:30 часот наутро, но кога пристигнале болничарите, ја затекнале Варнеки со бледо, восочно лице, како се бори за воздух седната на подот покрај базенот за породување.
Итно била префрлена во болницата „Френкстон“, но за жал починала кратко по приемот. Истражителите сметаат дека смртта е резултат на масивно постпородилно крвавење, а резервите од нејзината крвна група биле целосно исцрпени додека лекарите се обидувале да ја спасат.
Клучен момент во истрагата бил фактот што бабицата, која била присутна при породувањето, темелно ги исчистила трагите од домот. Сопругот Натан дал изјава пред полицијата, но бабицата одбила да соработува. Според обвинителството, улогата и однесувањето на бабицата ќе бидат критични за исходот на истрагата.
Стејси Варнеки била квалификувана нутриционистка и на социјалните мрежи активно промовирала здрав и природен начин на живот. Се верува дека желбата за домашно породување произлегла од рестрикциите воведени за време на пандемијата, како и од нејзината свесна одлука да избегне било какви здравствени прегледи за време на бременоста — без ултразвук, без рутински контроли кај бабица или гинеколог.
Бабицата која ја прислужувала Стејси на интернет се претставувала како поддржувачка на концептот на „слободно породување“.
Продолжението на судењето за овој трагичен случај е закажано за март 2026 година.
