Четириесет и тригодишен водоинсталатер е осомничен за серија тешки злосторства во Полска, при што обвинителството засега го поврзува со убиства на шест жени, меѓу кои и две сестри.
Истражителите, сепак, проверуваат и други смртни случаи на постари жени кои претходно биле заведени како природна смрт, поради што не се исклучува можноста бројот на жртвите да биде поголем.
Според полските медиуми, осомничениот работел како водоинсталатер и преку својата работа ја стекнувал довербата на жени кои живееле сами. Откако ќе извршел некоја поправка, наоѓал причина повторно да се врати во нивниот дом.
Истражителите сметаат дека при првата посета внимателно го разгледувал просторот и дознавал каде жртвите би можеле да чуваат пари и вредни предмети.
При повторното доаѓање, според сомнежите, носел ракавици, леплива лента и пластични врвки, со кои ги врзувал жените и им се заканувал додека не му откријат каде се наоѓаат парите и вредностите.
Полските медиуми пренесуваат дека во дел од случаите жените биле убиени и покрај тоа што му ги предале бараните предмети.
Осомничениот наводно потоа се обидувал смртта да изгледа како да настапила од природни причини, а пред да замине ги заклучувал вратите.
Мажот бил уапсен на 23 февруари 2025 година, откако жена во чиј дом се наоѓал успеала да се јави во банка за да го промени ПИН-кодот на картичката.
Според истрагата, тој ѝ пришол одзади и ја задавил, а пригушените крици ги слушнал банкарски службеник кој веднаш ја алармирал полицијата.
Полициските службеници пристигнале на местото и го фатиле пред да успее да побегне. Во моментот на апсењето, според информациите, бил под дејство на дрога.
Во февруари 2026 година против него било поднесено обвинение за убиство на шест жени и за грабеж на седма жена, која починала од срцев удар за време на разбојништвото.
Истрагата дополнително се проширила откако во неговиот мобилен телефон биле пронајдени околу 75.000 фотографии. На дел од нив биле забележани предмети кои, според истражителите, им припаѓале на жртвите, додека други фотографии биле направени на локации кои сè уште не се идентификувани.
Токму поради тоа полицијата проверува дали осомничениот можеби дејствувал и на други места.
Со проширувањето на истрагата биле поврзани и убиствата на две сестри близначки во декември 2024 година, како и смртта на уште една постара жена во јануари 2025 година.
Во рамките на случајот бил уапсен и негов 33-годишен цимер, украински државјанин. Се истражува и можната улога на уште еден Украинец, како и на полски државјанин за кого постои сомнение дека помагал во продажба на украдените предмети.
Според информациите од истрагата, главниот осомничен засега не соработува со истражителите.
Случајот сè уште не е стигнат до суд, бидејќи обвинителството продолжува да проверува поголем број смртни случаи и да собира дополнителни докази.
