Почетокот на седмицата во Македонија ќе помине во знакот на сончево време, студени утра и релативно високи дневни температури, но веќе од крајот на неделата се очекува значителна промена.
Според прогнозата на метеорологот Славчо Попоски, до среда, 7 октомври, времето ќе остане претежно сончево. Ноќите и утрата ќе бидат мирни и без ветер, додека во текот на денот ќе дува слаб до умерен ветер од променлив правец.
Утринските температури низ земјава ќе се движат од -1 до 8 степени, а во Беровскиот регион локално можат да бидат и пониски.
Во текот на денот, пак, ќе биде значително потопло, со максимални температури од 21 до 28 степени.
Слично време се очекува и во Скопје и околината. Утрата ќе бидат релативно студени, со температура околу 5 степени, додека дневната температура ќе се искачува до околу 27 степени.
Промената на временската состојба ќе започне од четврток, 8 октомври, кога над Македонија ќе има повеќе облачност, а утринските температури ќе почнат да растат.
Од петок, 9 октомври, како и во текот на продолжениот празничен викенд, се очекуваат локални врнежи од дожд.
Според Попоски, на одредени места врнежите може да бидат поројни и проследени со грмежи, а ќе има и засилен ветер.
Така, по неколкуте сончеви и релативно топли денови со температури до 28 степени, крајот на седмицата ќе донесе понестабилно и дождливо време.
