Претседателката на Европската комисија, Урсула фон дер Лајен, испрати силна и недвосмислена порака пред почетокот на дводневниот самит на Европската унија во Брисел – договор за финансирање на Украина мора да има, без разлика на сложеноста на разговорите.
Таа изјави дека очекува земјите-членки да постигнат заеднички став и конкретно решение за поддршката на Украина, нагласувајќи дека лично нема намера да го напушти состанокот додека тоа не се случи. Нејзината изјава доаѓа во момент кога во ЕУ сè уште постојат несогласувања околу начинот и изворите на финансирање.
Една од клучните точки на разговор е користењето на замрзнатите руски средства во Европа. За таа цел, потребна е согласност и гаранција за Белгија, земјата во која се чува најголемиот дел од тие средства. Според европските лидери, Белгија мора да биде сигурна дека нема да остане сама доколку Русија покрене правни постапки пред меѓународните судови.
Фон дер Лајен јавно истакна дека Европската комисија целосно стои зад Белгија и дека ќе ѝ обезбеди политичка и правна поддршка во случај на евентуални последици.
Самитот се одвива во чувствителен геополитички момент, а исходот од разговорите ќе има директно влијание врз идната поддршка за Украина и единството на Европската унија. Очекувањата се дека преговорите ќе бидат тешки, но притисокот за договор е посилен од кога било.
