Ајкула која на 18 септември била забележана во тесен канал во крајбрежен парк во Бусан, Јужна Кореја, веќе речиси три недели одбива да го напушти местото, и покрај повеќекратните обиди на надлежните да ја насочат кон отвореното море.
Необичниот случај привлекол огромно внимание, а според градските власти, ајкулата која локалните жители ја нарекле „Буканги“, според Северното пристаниште, придонела паркот да го посетат повеќе од 1,02 милиони луѓе, пренесуваат тамошните медиуми.
Првично, поморската полиција и локалните власти се обиделе едноставно да ја избркаат ајкулата од тесниот канал. Меѓутоа, откако таа продолжила да останува во ограничениот простор, надлежните започнале и операција за нејзино спасување.
Причината за ваквата одлука била загриженоста дека долготрајниот престој во каналот би можел да влијае врз нејзината физичка состојба и издржливост.
Првиот сериозен обид за спасување бил направен на 29 септември. Пет пловни објекти користеле водени млазови со цел да ја насочат ајкулата кон излезот од каналот и кон отвореното море.
Но, ајкулата не реагирала како што очекувале спасувачите. Таа успеала да ги избегне водените млазови, па по околу пет часа обиди операцијата била прекината.
Надлежните не се откажале и организирале втор обид, овојпат со поинаков пристап.
Во петокот спасувачкиот тим поставил огромна мрежа долга 50 метри и висока 6,8 метри, со намера да ја насочи ајкулата кон излезот од каналот.
Сепак, ниту овој план не дал резултат. Мрежата се закачила за дното на каналот, додека ајкулата воопшто не направила обид да излезе од просторот.
Поради тоа, спасувачите на крајот ја отстраниле мрежата и одлучиле да ѝ остават можност на ајкулата сама да го напушти каналот и да се врати во морето.
Но, и овојпат таа останала таму.
Во меѓувреме, Националниот институт за наука за рибарство соопштил дека здравствената состојба на ајкулата се следи секојдневно. Според досегашните набљудувања, кај животното не се забележани сериозни здравствени проблеми.
Иако за надлежните останува предизвикот да ја извлечат од ограничениот простор, ајкулата во меѓувреме станала своевидна туристичка атракција, привлекувајќи огромен број посетители во крајбрежниот парк.
Засега останува неизвесно кога „Буканги“ конечно ќе реши да го напушти каналот, но по неколкуте неуспешни спасувачки обиди, таа очигледно нема намера лесно да се откаже од своето необично престојувалиште.
